Literari muzykaluo Andrejdīna
Literari
muzykaluo Andrejdīna nu 1998. goda leluokā voi mozākā mārūgā i skanējumā
bejuse Latgolys kulturys telpā. Itūgod 30. novembrī 18.00 stuņdēs nūtiks Lūznovys
muižā ar literata Oskara Seiksta gruomotys “Atīsmis” atvieršonu, jaunīšu
nūmetnis izstuodis “Sūpluokīšu dzymtu stuosti” nūslāgumu i literarū kabarē, kas
ļaus nūsaceit ituo goda Uoksta capuris īgivieju – spicuokū tekstu i juo autoru.
Literats Oskars Seiksts 15. novembrī svinēs opolu jubileju. Lai ari juo veikums vaira ir pazeistams tīši 21. godu symta suokūs, Oskars turpynoj dzeivuot volūdā ari tān. Kruojums “Atīsmis” ir juo pādejūs godu dzejis, filozofisku puordūmu par sātu, saknem, breiveibu i volūdu apkūpuojums. Kai gruomotys dalykumvuordukūs roksta juo draugs i pyrmūs autoru leidzradeituojs Valentins Lukaševičs: “Volūdā kotrys vuords ir kai tukša skaline – mozeņa, videja ci lela. Oskars tuos skalinis rauga pošjādzyski saveikšēt, pīštopēt ar skoniskom, saturiskom, metaforiskom i cytom nūzeimem tik pylnys, ka aiz rūktura i bais pajimt – var puorlyuzt.”
Gruomotā īpazeisim ari mozuok zynomu O. Seiksta byuteibu – juo pietnīceibys aizsuokumus ar polonismism Jezupa Macileviča “Pavuiceišonā..” (1850) i latgalīšu volūdā. Gruomotā ir ap 300 polonismu, kas īguojuši latgalīšu zemnīka kasdīnā 19. godu symta vydā, daudzi iz palikšonu latgalīšu volūdā.
Izstuode “Sūpluokīšu dzymtu stuosti” sovu ceļuojumu nūslēgs tīši Andrejdīnā, ļaunūt vēļ pošim sūpluokīšim i gostim pasaceinēt izstuodis labirintūs.
Vysam pa vydu literārais kabarē, kas nu 2003. goda ir bejs veida kai jaunī teksti (i autori) sasateik ar jau zynomajim, kai raksteituojs sateik sovu skaiteituoju. Itūreiz byus vareiba pīsadaleit literārajā kabarē ari attuolynuoti (roksti da 20. novembra: ilga.suplinska@gmail.com), tok emocejis i sarunys kluotīnē ari gaida sovus klauseituojus.
Par muzykalajim puorsteigumim pasaryupēs Sovvaļnīks i Mareks, Kristaps Višs i Dana Vasiļjeva, kas zeimoj, ka skanēs spieceigi latgalīšu teksti i individuālu rūkrokstu muzyka. Īsapazeisim ari ar viļānīti Emīlu Loginu, kas beja vīns nu sūpluokīšu i īdedze ar sovu myzykalū aizrauteibu ari cytus.
Tīšraidi vari vērtīs ite
Pasuokums ir divu leluoku Latgalīšu kulturys bīdreibys projektu rezultatu apkūpuojums, partū daudz ari atbaļsteituoju. Pasuokums nūteik ES programā, MARIO granta projektā “Dzimtu stāsti multikulturālajā Latgalē un latgaliešu valodā”, Nr. LV022023. Oskara Seiksta gruomotys izdūšonu atbolsta: Vaļsts kulturkapitala fonda mierķprograma “Latvīšu viesturiskūs zemu atteisteibys programa”, bīdreiba “Latgolys regiona atteisteibys agentura” i Rita Wessius Foundation (Zvīdreja).
Sagataveja LKB
vadeituoja, projektu koordinatore
Ilga
Šuplinska
